Erstatning ved flytterestriksjonar på bier

Du kan søkje erstatning for produksjonssvikt.

• Produksjonsopplegget for honning er ofte basert på strategisk flytting av bikubar mellom område med rik blomstring til ulike tider av sesongen. Verksemder som blir ilagde flytterestriksjonar for bikubane sine, kan derfor oppleve svikt i honningproduksjonen.     
• Føremålet med erstatningsordninga er å gje økonomisk erstatning for å redusere belastninga ved ulike tiltak mot planteskadegjerarar, dyresjukdommar og smittestoff. 

Til søknaden skal du leggje ved vedlegg. Vi tilrår at du har dette klart når du registrerer søknaden.

Gå til skjemaet Erstatningsordningane i landbruket via Altinn for å søkje erstatning. Her blir du beden om å logge inn. Du finn informasjon om korleis du loggar inn, på nettsidene til Altinn.         

I skjemaet skal du registrere       

• grunnopplysningar 
• eventuelle merknader og tilleggskommentarar 

I tillegg skal du leggje ved   

• Vedtak om flytterestriksjonar frå Mattilsynet. 
• Dokumentasjon på sal av honning, vist i mengd og beløp, i kvart av dei siste tre åra før restriksjonen blei sett i verk. Desse opplysningane går fram av hovudbok, næringsoppgåve eller rekneskapsbilag. 
• Dokumentasjon på talet på produksjonskubar dei tre siste åra før restriksjonen blei sett i verk, og talet på produksjonskubar i skadeåret. 

Rekneskapsutskrifter skal vere stadfesta av ein ekstern rekneskapsførar, revisor eller kommune.    

Talet på produksjonskubar i gjennomsnittsår og skadeår bør som hovudregel vere i samsvar med søknad om produksjonstilskot det aktuelle skadeåret. Dersom det er avvik, må du grunngje dette. 

Dersom du ikkje kan søkje digitalt, kan du bruke skjemaet Søknad om erstatning etter offentlege pålegg i plante- og husdyrproduksjon for å sende søknad på e-post eller i vanleg post. 

Når du trykkjer «Send søknad», blir søknaden automatisk send til statsforvaltaren. Du får stadfesting på skjermen om at søknaden er send inn, og også i innboksen din i Altinn.      

Dersom du søkjer på papirskjema, skal søknaden med vedlegg sendast på e-post eller i vanleg post til statsforvaltaren.

Når statsforvaltaren har fått søknaden, sjekkar dei opplysningane du har sendt inn. Dersom dei treng meir informasjon kan dei be om dette.

Statsforvaltaren behandlar søknaden og gjer vedtak.  

Grunnlaget for utrekning av ei eventuell erstatning er  

• nedgangen i kilo honning produsert det aktuelle året med restriksjon i forhold til gjennomsnittsproduksjon dei siste tre åra før restriksjonen blei sett i verk 

Gjennomsnittsproduksjonen blir rekna ut basert på dokumentert honningproduksjon i kilo per produksjonskube dei siste tre åra før skadeåret. Differansen mellom utrekna gjennomsnittsproduksjon og gjennomsnittsproduksjon for dei same kubane i året med restriksjon blir multiplisert med erstatningssatsen (kroner per kilo honning) og multiplisert med talet på kubar.   

Søknaden kan bli teken ut i kontroll. Du pliktar å godta kontroll, gje nødvendige opplysningar og hjelpe til med å gjennomføre kontrollen. Kontrollar kan gjere at saksbehandlinga tek lengre tid.

Du får svar på søknaden i innboksen din i Altinn. Dersom du har sendt papirsøknad, får du svar i e-post eller som brev i posten. 

Får du erstatning, blir pengane automatisk overførte til konto. Det er Landbruksdirektoratet som betalar ut pengane. 

Du kan klage på vedtaket. Send klaga til statsforvaltaren. Landbruksdirektoratet vil behandle klagesaka dersom ikkje statsforvaltaren gjer om vedtaket.

Dersom det er gjort feil i utbetalingar, er gjort regelbrot eller du har gjeve feil opplysningar, kan Landbruksdirektoratet krevje tilbakebetaling og/eller avkorte tilskotet.