Kompensasjon ved beiterestriksjonar på grunn av rovvilt

Ved vedtak om restriksjonar i bruk av utmarksbeite på grunn av rovvilt, kan du søkje kompensasjon etter faste satsar for  

• småfe 
• storfe 

For dyr på innmarksbeite eller anna inngjerda eller rovdyrsikra beite er kompensasjonen per dyr per dag avgrensa til 

• 7 kroner for småfe  
• 32 kroner for storfe 

Kompensasjonen blir rekna ut innanfor desse rammene etter dei satsane som blir nytta til konfliktdempande tiltak i rovviltforvaltninga, i den aktuelle regionen.   

• Mattilsynet kan gje pålegg om beiterestriksjonar i utmark av omsyn til dyrevelferd.  
• Kompensasjonsordninga skal bidra til å redusere utgiftene til dyreeigaren ved eit vedtak om restriksjonar i bruk av utmarksbeite på grunn av rovvilt.  
• Det blir berre gjeve kompensasjon for vedtak frå Mattilsynet, som gjeld i beitesesongen. Beitesesongen er perioden mellom normal dato for beiteslepp og normal sankedato. Det er statsforvaltaren som bestemmer desse datoane.  
• Det blir ikkje gjeve kompensasjon dersom dyreeigaren får dekt utgiftene til gjennomføring av tiltaket på annan måte. Dersom utgiftene til tiltaket delvis er dekte, blir det gjort tilsvarande fråtrekk ved utrekninga av kompensasjon.      

Til søknaden skal du leggje ved kopi av vedtak frå Mattilsynet og nødvendig dokumentasjon. Vi tilrår at du har dette klart i god tid før søknadsfristen.

Det finst ikkje eit eige skjema for å søkje kompensasjon på grunn av rovvilt. For å søkje må du derfor skrive eit søknadsbrev i fritekst.    

Hugs søknadsfristen 31. oktober det året restriksjonen gjeld.     

I søknadsbrevet skal du ha med informasjon om 

• kven som søkjer 
• kontaktinformasjon 
• kontonummer 
• talet på dyr som skal sleppast på eller er sanka frå det restriksjonslagde utmarksbeitet 
• tidslengd på restriksjonsperioden  

I tillegg skal du leggje ved kopi av vedtak frå Mattilsynet og nødvendig dokumentasjon.  

Søknaden sender du til statsforvaltaren i bustadsfylket ditt.

Når statsforvaltaren har fått søknaden, sjekkar dei opplysningane du har sendt inn. Dersom dei treng meir informasjon kan dei be om dette.

Statsforvaltaren behandlar søknaden og gjer vedtak. Kompensasjonen blir rekna ut etter dei satsane som blir nytta til konfliktdempande tiltak i rovviltforvaltninga, i den aktuelle regionen.

Søknaden kan bli teke ut i kontroll. Du pliktar å godta kontroll, gje nødvendige opplysningar og hjelpe til med å gjennomføre kontrollen. Kontrollar kan gjere at saksbehandlinga tek lengre tid. 

Du får svar på søknaden som brev i posten.

Får du kompensasjon, blir pengane automatisk overførte til konto. Det er Landbruksdirektoratet som utbetalar pengane.

Du kan klage på vedtaket. Send klaga til statsforvaltaren. Landbruksdirektoratet vil behandle klagesaka dersom ikkje statsforvaltaren omgjer vedtaket.

Dersom det er gjort feil i utbetalingar, er gjort regelbrot eller du har gjeve feil opplysningar, kan Landbruksdirektoratet krevje tilbakebetaling og/eller avkorte tilskotet.