Tilskot til drift av beitelag (OBB)

Beitelaget kan få tilskot til drift, altså til beiteslepp, tilsyn og sanking av dyr. Tilskotet skal gå til å fremje den organiserte beitebruken gjennom fellestiltak. Det er ikkje mogleg å fordele tilskotet på dei enkelte medlemmene i beitelaget.  

Sjå også ordninga tilskot til tiltak i beiteområde.  

Føremålet med ordninga er å leggje til rette for ei meir rasjonell utnytting av utmarka og redusere tap av dyr på beite. Tilskotet blir målt ut per dyr som er sleppt på utmarksbeite.

Ordninga er ein del av regionale miljøprogram, men har eige søknadsskjema.

I søknaden skal du registrere talet på dyr som er sleppte og sanka, og alle medlemmer med organisasjonsnummer og beiteområde. Du bør ha dette klart når du registrerer søknaden. Dersom laget søkte tilskot i fjor, ligg medlemmene med organisasjonsnummer og beiteområde ferdig utfylt.

Gå til skjemaet Søknad om tilskot til organisert beitebruk via Altinn, for å søkje. Her blir du beden om å logge inn. Du finn informasjon om korleis du loggar inn på nettsidene til Altinn. 

Hugs søknadsfristen 15. november.  

I Altinn må du velje kva for eit føretak du skal søkje for, og deretter vel du fylket og kommunen der beitelaget er registrert.

Inne i skjemaet skal du registrere

• kontaktinformasjon for beitelaget
• kontonummer, dersom det ikkje eksisterer frå før (du kan også endre kontonummer)
• eventuelle endringar i beiteområdet
• For kvar medlem skal dette fyllast ut:
  • organisasjonsnummer
  • beiteområde
  • talet på dyr som er sleppte og sanka
• informasjon om tilsyn, beiteslepp og sanking
• melding frå beitelaget om beitelagsaktiviteten

Det er ingen krav om vedlegg til denne søknaden, men statsforvaltaren i ditt fylke kan stille eigne krav til rapportering. Sjå rettleiingsheftet for regionale miljøprogram frå statsforvaltaren. Du kan leggje ved vedlegg om du har behov for det.  

Når du trykkjer på «Send inn» i søknadsskjemaet, blir søknaden send til kommunen automatisk.

Du får stadfesting på at søknaden er send, i sjølve søknadsskjemaet (kvittering) og i «Min meldingsboks» i Altinn.

Når kommunen har fått søknaden, sjekkar dei opplysningane du har sendt inn. Dersom dei treng meir informasjon kan dei be om dette.

Kommunen behandlar søknaden og gjer vedtak om tilskot.

Søknaden kan bli teke ut i kontroll. Beitelaget pliktar å godta kontroll, gje nødvendige opplysningar og hjelpe til med å gjennomføre kontrollen. Kontrollar kan gjere at saksbehandlinga tek lengre tid.  

Det er kommunen som behandlar søknadene og gjer vedtak om tilskot. Svaret på søknaden din blir sendt til meldingsboksen din i Altinn i forkant av utbetalinga, vanlegvis i midten av mars det komande året.

Får du tilskot, blir pengane automatisk overførte til kontoen din. Hovudutbetalingane for søknader som blei sende i 2025, blir utførte 12.03.2026 og dei næraste følgande dagane. Det er Landbruksdirektoratet som betalar ut pengane. Søknadar som ikkje var ferdig behandla til hovudutbetalinga, blir betalt ut etter kvart som kommunane gjer vedtak.

Du kan klage på vedtaket. Klaga sender du til kommunen. Statsforvaltaren vil behandle klagesaka dersom ikkje kommunen gjer om vedtaket.     

Klagefrist: 3 veker.

Dersom det er gjort feil i utbetalingar, er gjort regelbrot eller du har gjeve feil opplysningar, kan forvaltninga krevje tilbakebetaling og/eller avkorte tilskotet.