Tilskot ved produksjonssvikt

Du kan søkje tilskot for

• produksjonssvikt for bær
• produksjonssvikt for frukt
• produksjonssvikt for grønsaker
• produksjonssvikt for korn
• produksjonssvikt for poteter
• produksjonssvikt for grovfôr i føretak med husdyr
• produksjonssvikt for grovfôr i salsproduksjon

Du kan ikkje få tilskot for

• produksjonssvikt som har opphav i sjukdommar, skadedyr og ugras, sjølv om førekomsten kan knytast til klimatiske forhold
• produksjonssvikt som kjem av ei driftsform som ikkje er fagleg forsvarleg
• produksjonssvikt som kjem av forhold som kan kontrollerast ved aktiv bruk av førebyggjande tiltak
• indirekte klimatisk skade, til dømes dårleg pollinering, som gjev låge avlingar, eller sterk vind, som gjev mykje nedfallsfrukt. Jordskred blir i utgangspunktet ikkje rekna som direkte klimatisk skade.  

• Berre skadar som skriv seg frå klimatiske forhold, kan gis tilskot for.
• Avlinga i skadeåret må vere mindre enn 70 prosent av gjennomsnittsavlinga for vekstgruppa for å utløyse grunnlaget for tilskot. Det vil seie at det er ein eigen risiko på 30 prosent.
• Produksjonssvikten må ha ein klimatisk årsak det ikkje er mogleg å sikre seg mot.
• Tilskot føreset at det er godt dokumentert at det er ein klimatisk skade som er årsak til produksjonssvikten.
• Tilskot føreset at føretaket har drive på ein fagleg forsvarleg måte og gjort det som ein normalt kan rekne med for å førebyggje tap. Dette inkluderer, men er ikkje avgrensa til, at art og sort skal vere tilpassa normale klimatiske forhold, at arealet skal vere godt drenert, og at avlinga må bli hausta.
• Tilskot kan gis til føretak som  
  • har hatt svikt i plante- eller honningproduksjon på bakgrunn av klimatiske forhold 
  • på skadetidspunktet oppfyller vilkåra for å kunne få produksjonstilskot
  • ikkje kan få dekt tapet gjennom ei allment tilgjengeleg forsikringsordning eller på anna måte
  • utan ugrunna opphald har gjeve melding til kommunen om at skade har oppstått, eller vil kunne oppstå

Som vedlegg til søknaden skal du leggje ved dokumentasjon over årsakssamanheng mellom skaden og klimatiske forhold, og ei vurdering av om heile produksjonssvikten kjem av klimaskade, eller om heile eller ein del av produksjonssvikten kjem av dyrkingstekniske forhold. Vi tilrår at du har dette klart i god tid før søknadsfristen.

Før du søkjer, må du sende melding til kommunen om skaden, slik at dei kan kontrollere arealet på eit tidspunkt der klimaskaden kan påvisast. Feltkontrollen til kommunen vil også kunne avdekkje andre skadeårsaker – til dømes ugras eller plantesjukdommar. 

Ved store tap og likviditetsproblem kan du søkje om forskotsutbetaling. For å gjere dette sender du ein førebels søknad på tilsvarande måte som ein vanleg søknad, men det er då mindre krav til dokumentasjon på søknadstidspunktet. I etterkant må du leggje inn opplysningane som ikkje blei med i denne søknaden. Ta kontakt med kommunen dersom dette er aktuelt for deg.

Gå til Erstatningsordningane i landbruket via Altinn for å søkje. Her blir du beden om å logge inn. Du finn informasjon om korleis du loggar inn, på nettsidene til Altinn.  

Du kan også levere søknad om tilskot på papir.  

Hugs søknadsfristen 31. oktober det året produksjonssvikten har oppstått. Fristen er endeleg og det er berre ved særlege høve det kan gis dispensasjon frå denne.

• grunnopplysningar med informasjon om søkjaren, kontonummer og driftssenter
• skadeårsak og skadebilete
• opplysningar om produktet du søkjer tilskot for, mellom anna areal og totalavling for fleire år

Til søknaden skal du leggje ved skildring og dokumentasjon av

• årsakssamanheng mellom skaden og klimatiske forhold
• vurdering av om heile produksjonssvikten kjem av klimaskade, eller om heile eller ein del av produksjonssvikten kjem av dyrkingstekniske forhold
• God dokumentasjon kan vere ei stadfesting på klimautfordringar frå kommunen eller eit profesjonelt fagmiljø. Annan god dokumentasjon vil til dømes vere skadeomfang i heile område eller meteorologiske data. Bilete kan gje god tilleggsinformasjon.

Dersom du søkjer digitalt, kan du liste opp vedlegg også etter at søknaden er send inn. 

Dersom du ikkje kan søkje digitalt, kan du bruke eit av desse skjemaa:

• Søknad om erstatning ved avlingssvikt – vekstgruppe potet (LDIR-271)
• Søknad om erstatning ved avlingssvikt – vekstgruppe korn (LDIR-272)
• Søknad om erstatning ved avlingssvikt – vekstgruppe grønsaker (LDIR-273) 
• Søknad om erstatning ved avlingssvikt – vekstgruppe grovfôr i føretak med husdyr (LDIR-274) Bokmål
• Søknad om erstatning ved avlingssvikt – vekstgruppe grovfôr (salsproduksjon) (LRID-275) Bokmål
• Søknad om erstatning ved avlingssvikt – vekstgruppe bær (LDIR-276)
• Søknad om erstatning ved avlingssvikt – vekstgruppe frukt (LDIR-277)

Når du trykkjer på “«Send skjema» blir søknaden automatisk send til kommunen. Når du søkjer digitalt, får du stadfesting i «Mitt landbruksføretak» i Altinn.

Dersom du brukar papirskjema, sender du søknaden til kommunen på e-post eller i vanleg post. Om du får stadfesting på søknaden du har sendt inn på e-post/post, er avhengig av rutinar hos kvar enkelt kommune. 

Når kommunen har fått søknaden, sjekkar dei opplysningane du har sendt inn. Kommunen skal ha høve til å kontrollere årsaka til skaden (klimarelatert årsak). Dersom dei treng meir informasjon kan dei be om dette.

Det er statsforvaltaren som behandlar søknaden og gjer vedtak.

Søknaden kan bli teke ut i kontroll. Du pliktar å godta kontroll, gje nødvendige opplysningar og hjelpe til med å gjennomføre kontrollen. Kontrollar kan gjere at saksbehandlinga tek lengre tid.  

Du får svar på søknaden i «Mitt landbruksføretak» i Altinn. Dersom du har sendt papirsøknad, får du svar i e-post eller i vanleg post.

Får du tilskot, blir pengane automatisk overført til konto så fort vedtaket er gjort. Det er Landbruksdirektoratet som utbetalar pengane.    

Det blir ikkje utbetalt tilskot under 5 000 kroner og over 750 000/1 500 000 kroner.

Ved store tap og likviditetsproblem kan det utbetalast eit forskot på inntil 50 prosent av forventa tilskot.

Du kan klage på vedtaket. Klaga sender du til kommunen. Kommunen uttalar seg om klaga og vidaresender henne til statsforvaltaren. Statsforvaltaren skal gjere dei undersøkingane klaga gjev grunn til, og vurdere innhaldet i vedtaket på nytt, i lys av klagegrunnane. 

Dersom statsforvaltaren finn at klaga er rettmessig, skal den oppheve eller endre vedtaket og sende det nye vedtaket til føretaket utan å varsle Landbruksdirektoratet. Dersom statsforvaltaren finn at vilkåra for å behandle klaga er til stades, men ikkje finn klaga rettmessig, skal klaga med saksdokument sendast til Landbruksdirektoratet for klagebehandling.    

Klagefrist: 3 veker.  

Omtrentleg tid for klagebehandling: 3 månader.  

Dersom det er gjort feil i utbetalingar, er gjort regelbrot eller du har gjeve feil opplysningar, kan Landbruksdirektoratet krevje tilbakebetaling og/eller avkorte tilskotet.    

Heile eller delar av tilskotet kan også bli avkorta dersom føretaket ikkje har drive på ein fagleg forsvarleg måte og gjort det som ein normalt kan rekne med for å førebyggje tap. Sjølv om avlingsskaden er klimarelatert, kan tilskotet blir redusert dersom arealet til dømes er dårleg drenert, eller om det er mykje ugras.