Ekstra innbetaling til skogfond

Dersom du som skogeigaren har trekt mindre enn 40 prosent skogfond av virkeomsetninga i eit kalenderår, kan du gjere ei ekstra innbetaling. På grunnlag av registrert virkeomsetning innanfor eit kalenderår kan skogeigaren setje av inntil 40 prosent av bruttoverdien på virket (inkludert eventuelle etterbetalte bonusar). Dersom det er trekt mindre enn 40 prosent, kan differansen betalast inn. Ekstra innbetaling kan vere aktuelt dersom du skal gjere tiltak i skogen når du kan bruke skogfondsmidlar, men ikkje har dekning på skogfondet.   

• Skogfond er ei lovpålagd fondssparing som skal sikre at skogeigaren har midlar til å finansiere investeringar i eigen skog.  
• Når skogeigaren sel tømmer og biobrensel, trekkjer den som kjøper virke, pengar til skogfondet frå oppgjeret og set pengane inn på skogfondkontoen.  
• Ved småsal direkte frå garden må skogeigaren sjølv rapportere salet og betale inn til skogfondet.   
• Alle skogeigedommar skal ha sin eigen skogfondkonto. 
• Pengane på skogfondkontoen følgjer skogeigedommen og høyrer til skogeigaren.    
• Det er skogeigaren sjølv som må registrere ekstra innbetaling.  

For å registrere innbetaling digitalt må du vere registrert som brukar i Skogfondsystemet. Dersom du ikkje har tilgang til systemet, må du registrere deg som ny brukar.  

Når du er registrert som brukar i Skogfondssystemet, kan du sjekke saldo på fondssparinga di ved å logge inn i Skogfondssystemet via Altinn.  

Under menyvalet «Statistikk og historikk» finn du lenkje til «Kontoutskrift». Der ser du saldoen på fondet, og du kan hente kontoutskrift for tidlegare år. 

For å registrere innbetalinga går du til Skogfondssystemet via Altinn. Her blir du beden om å logge inn. Du finn informasjon om korleis du loggar inn på nettsidene til Altinn. 

Hugs fristen for å registrere: seinast 6. februar det påfølgjande året. 

Registrer innbetalinga under menypunktet «Innbetaling av ekstra skogfond».  

Dersom du ønskjer at den ekstra innbetalinga skal kunne bokførast på same rekneskapsår som avverkinga er gjord, må ønsket om ekstra innbetaling vere registrert elektronisk seinast 5. januar. Ved bruk av papirskjema må skjemaet vere levert til kommunen så tidleg at dette er praktisk mogleg. 

Sjekk allereie registrerte opplysningar og rett opp i eventuelle feil om  

• kven som registrerer 

Du skal også registrere 

• beløp 

Når du trykkjer på «Send skjema», blir opplysningane automatisk sende til kommunen din. Du får stadfesting på at den ønskte innbetalinga er registrert, på skjermen og i innboksen din i Altinn.  

Dersom du ikkje har høve til å registrere innbetalinga digitalt, kan du bruke skjemaet Rapportering av skogfond og måleopplysningar (LDIR-918) og sende det til kommunen din. I skjemaet må du som skogeigar registrere deg sjølv både som kjøpar og seljar. 

Ved innsending av papirskjema sjekkar kommunen dei opplysningane du har sendt inn. Dersom kommunen treng meir informasjon, kan dei be om dette.

Dersom registrert beløp er innanfor grensa for innbetaling til skogfond det aktuelle året, blir det automatisk skrive ut faktura til deg.  

Frå papirskjema kontrollerer kommunen at beløpet er innanfor det som kan betalast inn, og legg det inn. Du vil få faktura på innbetalinga.

Etter at du har registrert betalinga, vil du få ein e-post eller brev med informasjon om innbetaling (faktura). Innbetalingsbrev blir sendt éin gong i månaden, rundt den 11. eller 12.