Tilskot til skogbruksplanlegging med miljøregistreringar

Etter «forskrift om tilskudd til skogbruksplanlegging med miljøregistrering» kan ein få tilskot til utarbeiding av skogbruksplanar og ressursoversikter, og registrering av skog- og miljøinformasjon i dette sambandet.

• Enkelttakst: Takst for ein enkelt skogeigedom. Kan vere aktuelt for større eigedommar.
• Fellestakst: Takst for fleire skogeigedommar som bestiller skogbruksplan innanfor eit geografisk avgrensa område.
• Områdetakst: Takst for alle, eller dei fleste, skogeigedommar innanfor eit geografisk avgrensa område, til dømes ein kommune.
• Deltaking på kurs i bruk av skogbruksplan/ressursoversikt, på inntil 50 prosent av kurskostnaden. Kursopplegget skal vere godkjent av statsforvaltaren.

Statsforvaltaren utarbeider hovudplan for skogbruksplanlegginga i eige fylke.

Ein skogbruksplan inneheld areal-, miljø- og ressursoversikter for kvar enkelt eigedom, oversiktlege og lett lesbare kart, og høve til råd om korleis eigedommen bør drivast, både i økonomisk og miljømessig samanheng.

Kunnskap om ressursane på eigedommen er ein føresetnad for å vurdere og utnytte det økonomiske potensialet til eigedommen. Slik kunnskap gjev grunnlag for å planleggje og gjennomføre viktige tiltak i skogen, som tømmerdrift, ungskogpleie og vegbygging.

• Statsforvaltaren må ha godkjent at taksten kan inngå i hovudplanen for skogbruksplanlegging i fylket. 
• Det må brukast godkjende standardar og takstmetodar som er vedtekne av Landbruksdirektoratet, jf. § 4 og § 6 i «forskrift om tilskudd til skogbruksplanlegging med miljøregistreringer». Dette gjeld dataformat, datadefinisjonar, utrekningsfunksjonar og innhald i planproduktet.
• Det må vere førehandsbestilt plan på minimum 50 prosent av arealet som inngår i takstområdet.
• Det må sendast digital kopi av data til Norsk institutt for bioøkonomi (NIBIO) etterpå, og dette blir lagra i ein eigen database. 
• Data, instruksar og all dokumentasjon som er knytt til takst- og utrekningsmetodar må oppbevarast i minimum 5 år. Oppdragstakaren oppbevarer dette.

Vedtak om tildeling av tilskot etter denne forskrifta blir gjort av statsforvaltaren.

Bestillingsskjema for skogbruksplan, dersom du søkjer tilskot til områdetakst og fellestakst.

Gå til Skogfondssystemet via Altinn for å søkje. Her blir du beden om å logge inn. Du finn informasjon om korleis du loggar inn, på nettsidene til Difi.

Søknadsfrist: Ta kontakt med statsforvaltaren eller den skogbruksansvarlege i kommunen din.

Dersom du ikkje har høve til å søkje digitalt, kan du bruke skjemaet Søknad om tilskot til skogbruksplanlegging med miljøregistrering (LDIR-927) for å sende søknad på e-post eller i vanleg post.

• personopplysningar om søkjaren
• kontonummer  
• aksept av vilkår

Dersom du søkjer tilskot til områdetakst eller fellestakst, er det vanleg å sende søknaden, saman med bestillingsskjema for skogbruksplan. Send søknaden til statsforvaltaren der eigedommen ligg. Når du søkjer digitalt, skjer dette automatisk.  

Dersom du søkjer digitalt, får du stadfesting i innboksen din i Altinn. Om du får stadfesting på søknaden du har sendt, på e-post eller i brev, er avhengig av rutinane hos kvar enkelt statsforvaltar/kommune.

Når statsforvaltaren har fått søknaden, sjekkar dei opplysningane du har sendt inn. Dersom dei treng meir informasjon kan dei be om dette.

Statsforvaltaren behandlar søknaden og gjer vedtak. Dei reknar eventuelt ut tilskot basert på netto kostnad, utan meirverdiavgift.

Søknaden kan bli teke ut i kontroll. Du pliktar å godta kontroll, gje nødvendige opplysningar og hjelpe til med å gjennomføre kontrollen. Kontrollar kan gjere at saksbehandlinga tek lengre tid. 

Du får svar på søknaden på e-post eller i vanleg post, normalt 2–3 veker etter at søknaden er motteken. Dersom du har søkt digitalt, får du svar i innboksen din i Altinn.

Det innvilga tilskotet blir utbetalt av statsforvaltaren etter skriftleg oppmoding frå tilskotsmottakaren og når prosjektet/tiltaket har fått godkjent sluttrekneskap.

For å dekkje kostnader utover eit eventuelt tilskot, kan du bruke inneståande på skogfondet. For å gjere dette går du til innbetaling og utbetaling i Skogfond eller fyller inn skjemaet Utbetaling frå skogfond til diverse føremål (LDIR-907), og sender det til kommunen der eigedommen ligg. 

Du kan klage på vedtaket. Send klaga til statsforvaltaren. Landbruksdirektoratet vil behandle klagesaka dersom ikkje statsforvaltaren omgjer vedtaket.

Dersom det er gjort feil i utbetalingar, er gjort regelbrot eller du har gjeve feil opplysningar, kan Landbruksdirektoratet krevje tilbakebetaling og/eller avkorte tilskotet.