Boazodoallodieđáhus

Siidaoassejođiheaddji lea geatnegahtton sáddet boazodoallodieđáhusa juohke jagi ovdal miessemánu 31. beaivvi maŋemus boazodoallojagi ovddas mii lei gaskkal cuoŋománu 1. beaivvi ja njukčamánu 31. beaivvi. 

Dát olbmot galget leat mielde boazodoallodieđáhusas

• Siidaoasi jođiheaddji. Jus siidaoasis leat guokte ovddasvástideaddji jođiheaddji (oktasaš siidaoassi), de galgaba goappaš jođiheddjiid namat leat dieđáhusas.
• Olbmot geain lea mearka ja geat leat oassin siidaoasis boazodoallolága § 10 nuppi lađđasa mielde.
• Seamma olmmoš ii galgga rievtti mielde čállojuvvot eanet go ovtta dieđáhussii, muhto vuolleahkásaš mánát, geaid váhnemat eaba oro ovttas ja geain leat bohccot sihke eatni ja áhči bealde soga, galget čállojuvvot goappaš siidaosiid dieđáhussii. 

Don sáhtát olles jagi dieđihit rievdadusaid miellahtuid birra du siidaoasis. Go don sáddet boazodoallodieđáhusa ovtta boazodoallojagi ovddas, de fertet ođasmahtten siidaoasi miellahtuid ovdal njukčamánu 31. beaivvi. Jus dagat rievdadusaid maŋŋel go boazodoallodieđáhus lea sáddejuvvon, de oidnojit rievdadusat boahtte jagi boazodoallodieđáhusas.

Jođiheaddji náittos-/ássanguoimmi, gii ieš ii leat jođiheaddji, ja vuolleahkásaš mánáid boazolohku sáhttá devdojuvvot siidaoassejođiheaddji boazologu fárrui.

Siidaoasi boazodoallodieđáhusas ii sáhte sihkkut olbmuid ja bohccuid earágo jus boazu lea njuvvojuvvon dahje jus boazu sirdojuvvo eará siidaoasi boazodoallodieđáhussii.

• Oktasaš siidaosiin lea goappaš jođiheddjiin vejolašvuohta sáddet boazodoallodieđáhusa. Doai fertebeahtti ieža gulahallat ja soahpat goabbá galgá logget sisa ja sáddet dieđáhusa siidaoasi ovddas. Goappaš jođiheaddjit oažžuba automáhtalaš guitte sáddejuvvon boazodoallodieđáhusas Altinn:as. Dat lea goappaš jođiheddjiid ovddasvástádus ahte dieđut mat leat sáddejuvvon leat riekta.
• Vejolaš rievdadusat diimmá boazolohkui
• Diimmá misiid ahkemolsun
• Miesit mat leat šaddan
• Miesit mat leat merkejuvvon
• Priváhta njuovvan ja vuovdin
• Olgoriikka njuovvan
• Ealihanbohccuid sirdin
• Boazomassimat
• Boazologu juohkin miellahtuide boazodoallojagi (njukčamánu 31. b.) loahpas

Ovdal go sáddet boazodoallodieđáhusa, de sáhtát ieš rievdadit siidaoassemiellahtuid ja sin rollaid. Dan dagat Altinn:a bokte, seamma sajis gos galggat sáddet boazodoallodieđáhusa. Muhtun rievdadusaid sáhtát ieš dohkkehit čovdosis, ja eará rievdadusaid ferte maiddái son geasa rievdadus guoská dohkkehit.

Siidaoasi sirdin ođđa jođiheaddjái galgá ain dieđihuvvot sierra skoviin stáhtahálddašeaddjái. Dán meannudeapmi sáhttá ádjánit.

Dat bohccot mat leat njuvvojuvvon njuovahagas leat ovdagihtii devdojuvvon boazodoallodieđáhussii. Logut leat vižžojuvvon njuovahagain/reidejeddjiin. Jus du mielas eai oro logut leame riekta, de fertet váldit oktavuođa njuovahagain/reidejeddjiin mii lea raporteren njuovvanloguid.

Mana skovvái Boazodoallodieđáhus Altinn:a bokte. Dáppe fertet logget sisa. Don gávnnat sisabeassandieđuid Altinn:a neahttasiidduin.

Muitte sáddet dieđáhusa ovdal miessemánu 31. b.

Don sáhtát deavdigoahtit ja sáddet dieđáhusa miessemánu 1. b. rájes. Don sáhtát álgit deavdimiin ja maŋŋel joatkit deavdimiin. Go leat deaddilan “Sádde”, de it sáhte šat rievdadit dieđáhusa ja sáddet ođđasit. Ovdal go deaddilat “Sádde”, de fertet dárkkistit loguid vai šaddet riekta.

Mii sávvat ahte sáddet dieđáhusa digitálalaččat. Jus dárbbašat veahki, de sáhttá stáhtahálddašeaddji du guovllus veahkehit du.

Muhtumiidda soaitá buorre addit earáide vuoigatvuođa deavdit skoviid, dat sáhttet leat eará olbmot dahje rehketdoallofitnodat. Bagadusa gávnnat Altinn:a neahttasiidduin. Don leat aŋkke ovddasvástideaddji daid dieđuid ovddas mat sáddejuvvojit.

Don ain sáhtát sáddet boazodoallodieđáhusa báberskovi bokte, dahje sáddet PDF-hámis sihkkaris dieđáhusa bokte stáhtahálddašeaddjái. Boazosearvvit fertejit sáddet digitálalaččat. Njuovahagaid njuovvanlogut leat ovdagihtii devdojuvvon digitála skovis. Eiseválddiin leat njuovahagaid njuovvanlogut, ja don fertet váldit oktavuođa stáhtahálddašeddjiin jus áiggut daid. Dat leat njuovahagaid raporterejuvvon njuovvanlogut mat leat vuođđun dieđáhussii ja siidaoasse- ja boazosearvedoarjagii. 

Sádde dieđáhusa stáhtahálddašeaddjái du boazodoalloguovllus. Dat geavvá automáhtalaččat go sáddet dieđáhusa digitálalaččat.

Boazodoallojagi 2023-2024 rájes lea boazodoallodieđáhus iešdieđáhus ja dan ii galgga stáhtahálddašeaddji dohkkehit.

Siidaoassejođiheddjiin ja boazoservviid ovddasteddjiin lea ovddasvástádus bearráigeahččat ahte logut mat bohtet ovdan boazodoallodieđáhusas leat ollislaččat ja riekta. Jus it sádde dieđáhusa, dahje das leat čielga boasttuvuođat dahje váilevašvuođat, de sáhttá stáhtahálddašeaddji čuovvolit dan. Dán birra sáhtát lohkat das vuollelis dárkkisteami vuolde.

Boazodoallodieđáhusa dieđut addet obbalašgeahčestaga boazodolliid, boazoeaiggádiid ja boazologu birra. Boazodoallodieđáhusa dieđut geavahuvvojit earret eará siidaoasse-/boazosearvedoarjaga ohcamuša vuođđun. Dieđáhus lea maiddái vuođđun boraspirevahátbuhtadusa ohcamuššii, ja statistihkkii ja prognosaide, dego ovdamearkka dihte Resursa- ja Obbalašrehketdoallu.

Stáhtahálddašeaddji sáhttá geahččat dieđuid boazodoallodieđáhusas. Jus lea vuođđu dasa, de sáhttá stáhtahálddašeaddji mearridit dahkat almmolaš dárkkistuvvon boazolohkama siiddain, siidaosiin ja boazoservviin. Stáhtahálddašeaddji sáhttá maiddái sihtat du sáddet duođaštusaid mat čilgejit dieđuid maid leat deavdán dieđáhussii. Jus sáddet boazodoallodieđáhusa mas leat čielga boasttuvuođat dahje váilevašvuođat, de sáhttá stáhtahálddašeaddji dahkat áššemearrádusa sankšuvnna birra. Dat mearkkaša ahte don sáhtát šaddat ođđa dieđuid addit. Dat čuovvu boazodoallolága kapihttal 11 mearrádusa. Jus ozat siidaoasse-/boazosearvedoarjaga, de sáhttet dieđut meannuduvvot ohcamuša oktavuođas. Jus leat addán boasttudieđuid, de dat sáhttá váikkuhit doarjjamáksimii. Stáhtahálddašeaddji sáhttá ovdamearkka dihte árvvoštallat gáibidit unnideami dahje hilgut doarjjaohcamuša.

Jus it sádde boazodoallodieđáhusa, de sáhttá stáhtahálddašeaddji dahkat mearrádusa sankšuvnna birra. Dat mearkkaša ahte don soaittát gohččojuvvot sáddet boazodoallodieđáhusa, ja ahte sáhttá mearriduvvot bággosáhkku dassážii boazodoallodieđáhus lea sáddejuvvon. Dat čuovvu boazodoallolága kapihttal 11 mearrádusa.

Boazodoallodieđáhus lea luohttevašvuođa ala vuođđuduvvon. Dat mearkkaša ahte dieđut boazologu birra dieđáhusas leat vuođđun go doarjjaohcamuš meannuduvvo. Boazodoalloeiseválddiin lea vejolašvuohta gáibidit ruovttoluotta máksit boasttumáksojuvvon doarjaga. Duođalaš dáhpáhusain sáhttet boazodoalloeiseválddit váidit siidaoassejođiheaddji dahje boazosearvvi go lea boasttudieđuid addán. Váidima sáhttá árvvoštallat dakkár áššiin gos siidaoassejođiheaddji dahje boazosearvi leat addán boasttudieđuid ohcamušain dahje gullevaš dokumeanttain mat leat dahkan dahje livčče sáhttán dahkat ahte ohcci oažžu doarjaga man ii livčče ožžon muđui, dakkár dieđut sáhttet leat ovdamearkka dihte boasttudieđut boazologu birra. Dát guoská dakkár dáhpáhusaide go doarjjavuostáiváldi ferte dahje livččii galgan diehtit ahte dagu geažil sáhttá šaddat vuoigatmeahttun doarjjamáksin. Jus dieđáhus divvojuvvo, de sáhttet leat váikkuhusat ovddit boazodoallojagiid doarjagiidda, ovdamearkka dihte jus boazolohku čájeha ahte doarjja ii livčče galgan juolluduvvot.

Go don sáddet boazodoallodieđáhusa, de oažžu du orohaga orohatstivra kopiija dieđáhusas. Dat čuovvu boazodoallolága § 18. Orohatstivra ovddida boazodoalloberoštumiid du orohagas ja sin bargu lea váldit vuhtii orohaga guohtunresurssaid. Dieđut boazodoallodieđáhusas lea dehálaččat earret eará orohaga boazolohkohálddašeapmái ja vai dihtet geat leat miellahtut orohagas. Orohatstivrra miellahtut leat jávohisgeatnegasvuođa vuollásaččat boazologu ja persovnnalaš dieđuid ektui boazodoallolága § 18 mielde.

Birasdirektoráhtta hálddaša ortnega. Don sáhtát ohcat buhtadusa bohccuid ovddas maid ráfáiduhtton boraspiret leat goddán Birasdirektoráhta elektrovnnalaš ohcanguovddážis. Ohcanáigemearri lea miessemánu 31. beaivvi.