Doarjja biebmamii ja johtimii konvenšuvdnaguohtumiid oktavuođas

Sáhttá ohcat doarjaga 

• johtimii 
• biebmamii 
• vejolaš eará goluide mat leat dárbbašlaččat biebmat ja johtit, nugo biebmoreaga jna oastit. 

• Ohcci galgá leat hehttejuvvon geavahit iežas árbevirolaš dálveguohtumiid váilevaš boazodoallokonvenšuvnna geažil. 
• Geaseheaddjis ja geasehanfievrrus, mii galgá geavahuvvot geaseheapmái, galget leat dárbbašlaš almmolaš dohkkeheamit geasehit ealli bohccuid. 
• Doarjja addo dušše dan boazologu vuođul mii ovttaskas orohagas lei lohpi doallat duovdagiin fámohuhttojuvvon boazodoallokonvenšuvnnas. 
• Jus ohcci lea siida, siidaoassi dahje boazodoalli, de doarjja meroštallojuvvo gorálaččat ohcci boazologu, orohaga boazologu ja orohaga boazologu vuođul mii das lei lohpi leat dálveeatnamiin Ruoŧas fámohuhttojuvvon boazodoallokonvenšuvnnas. 
• Galgá ovttastahttit eará geasehanruhtademiin, nugo vahátgeahpedeaddji doaibmabijuiguin. 

Ohcamuššii galggat bidjat mildosiid. Mii ávžžuhat du leat ordnen daid go registreret ohcamuša. 

Boazodoalu ovdánahttinfoanda. 

Geavat skovi Søknadsskjema for tilskudd til foring og flytting av rein som følge av stengte konvensjonsbeiter (LDIR-668), go ozat.   

Muitte ohcanáigemeari njukčamánu 31.b.   

• gii dat ohcá 
• kontonummara 
• masa ozat doarjaga 
• deavddát go don oppalaš eavttuid  

Dasa lassin galggat bidjat mielddusin (jus dus ležžet dat go ozat) 

• rehketdoalu goluiguin 
• rehkega geaseheaddjis 
• rehkega eará goluin biebmama oktavuođas 
• guitte mákson boazofuođđaris. 
• guitte mákson geaseheamis 
• guitte eará goluin mat leat leamaš biebmama oktavuođas 
• dokumentašuvnna das ahte geaseheaddjis leat dárbbašlaš dohkkeheamit geasehit bohccuid 

Sádde ohcamuša mildosiiguin Eanadoallodirektoráhttii e-poastan postmottak@landbruksdirektoratet.no, dahje Landbruksdirektoratet, Postboks 1450 Vika, N-0116 Oslo.   

Go Eanadoallodirektoráhtta lea ožžon ohcamuša, de oaččut duođaštusa e-poastan dahje reiven poasttas.   

Go Eanadoallodirektoráhtta lea ožžon ohcamuša, de iská direktoráhtta dieđuid maid don leat sádden. Jus direktoráhtta dárbbaša eanet dieđuid, de dat sáhttá bivdit daid. 

Eanadoallodirektoráhtta meannuda ohcamuša ja dahká mearrádusa áššis. 

 Ohcamuš sáhttá dárkkistuvvot. Don leat geatnegahtton dohkkehit dárkkisteami, addit dárbbašlaš dieđuid ja veahkehit čađahit dárkkisteami. Dárkkisteamit sáhttet vihpadit áššemeannudeami.

Don oaččut vástádusa ohcamuššii e-poastan dahje reiven, dábálaččat 3 vahku maŋŋá go mii leat ožžon ohcamuša.

Jus oaččut doarjaga, de 50 % ruđas automáhtalaččat biddjo kontui. Báhcán 50 % sirdojuvvojit go rehketdoallu ja duođaštusat leat sáddejuvvon ja dohkkehuvvon. 

Eanadoallodirektoráhtta dat máksá doarjaga. 

Áigemearri sáddet rehketdoalu ja dokumentašuvnnaid: suoidnemánu 1.b.   

Sáhtát váidit mearrádusa. Váidda sáddejuvvo Eanadoallodirektoráhttii. Eanandoallo- ja biebmodepartemeanta dat meannuda váiddaášši ja dahká loahpalaš mearrádusa. 

Váidináigemearri: 3 vahku das rájes go mearrádusdiehtu joavddai dutnje. 

Jus máksimis lea dahkkon boasttuvuohta, jus njuolggadusat leat rihkkojuvvon dahje jus don leat almmuhan boasttudieđuid, de sáhttá gáibiduvvot máksit olles doarjaga dahje oasi doarjagis ruovttoluotta.