Doarjja sadjásaččaide boazodoalus áhpehisvuođa, riegádahttima, adopšuvnna ja jápmima oktavuođas

Sáhtát ohcat doarjaga láigohit sadjásaččaid boazodoalus áhpehisvuođa/riegádahttima ja adopterema oktavuođas, ja vel siidaoassejođiheaddji eretvádjoleami oktavuođas. Doarjja galgá gokčat duohta goluid bálkái, luopmoruđaide ja bargoaddidivvagii, supmi vuođul mii lea raporterejuvvon a-ortnegii. Doarjja ii juolluduvvo sadjásažžii go adoptere náittos-/ássanguoimmi máná.

• Ortnet galgá leat mielde ruhtadeame sadjásaččaid boazodoalus áhpehisvuođa, riegádahttima, adopšuvnna ja jápmima oktavuođas.
• Ortnet ii gusto eará siidaoassemiellahtuid jápmima oktavuođas.
• Siidaoassi ferte leat vuoigaduvvon oažžut doarjaga njuolggadusa vuođul doarjaga birra siidaosiide ja boazoservviide.
• Siidaoassi ferte leat sádden boazodoallodieđáhusa doarjjajagi ovdii.
• Siidaoassejođiheaddjis ferte leamaš divatgeatnegahtton vuovdindienas iežas mearkkas unnimusat 50 000 r. lasseárvodivvaga haga. Jápmima oktavuođas ferte vádjolan siidaoassejođiheaddji leamaš deavdán eavttu boazodoallojagi ovdal vádjoleami. Jus siidaoassi lei sirdojuvvon ovdal jápmima, de ii sáhte juolluduvvot doarjja sadjásažžii, go vádjolan olmmoš ii lean siidaoassejođiheaddji go vádjolii.
• Siidaoassejođiheaddji ja/dahje náittos-/ássanguoibmi ferte leamaš registrerejuvvon siidaoasis doaibmajagis ovdal riegádahttima.
• Sadjásačča bargoveahkki ferte dáhpáhuvvan maŋemusat 12 mánu ovdal go ohcamuš sáddejuvvo. Doarjaga oažžu 24 vahkku áigodagas ovdal riegádahttima/adopšuvnna ja gitta golbma jahkái maŋŋel riegádahttima/adopšuvnna. Jápmima oktavuođas juolluduvvo doarjja áigodagas gitta 8 vahkku maŋŋel siidaoassejođiheaddji vádjoleami.
• Sadjásaš ferte leat badjel 16 jagi boaris, ii ge sus galgga leat ealáhusdienas siidaoasis dahje leat náittos-/ássanguoibmi muhtumii geas lea ealáhusdienas siidaoasis. 
• Sadjásačča bargoveahkki galgá ordnejuvvon bargi-bargoaddioktavuohtan

Ohcamuššii galggat bidjat mildosiid. Mii ávžžuhit ahte dus leat mildosat gárvásat go registreret ohcamuša.

Geavat skovi Tilskudd til avløsere i reindriften ved svangerskap og fødsel (LDIR-657) go ozat. 

Muitte ohcat maŋimusat 12 mánu maŋŋá go sadjásašortnet lea čađahuvvon. 

• Persovdnadieđuid
• Siidaoasi birra dieđuid
• Dieđuid sadjásačča birra
• Sadjásaš bargoveahki áigodaga
• Duohta goluid
• Oktavuođadieđuid

Dasa lassin galggat bidjat mielddusin

• Bargošiehtadusa sadjásaččain áigodaga ovddas
• Guitte mas boahtá ovdan ahte leat máksán bálkká
• Riegádanduođaštusa/adopšuvdnaduođaštusa
• Duođaštusa duohta goluid ovddas

Sádde ohcamuša mildosiiguin Eanandoallodirektoráhttii e-poasta bokte čujuhussii postmottak@landbruksdirektoratet.no, dahje poasta bokte čujuhussii Landbruksdirektoratet, Postboks 1450 Vika, N-0116 Oslo. Jus ozat elektrovnnalaččat, de boahtá automáhtalaččat.

Go Eanandoallodirektoráhtta lea ožžon ohcamuša, de oaččut duođaštusa e-poasta dahje poasta bokte ahte ohcamuš lea registrerejuvvon.

Go Eanandoallodirektoráhtta lea ožžon ohcamuša, de sii gehččet dieđuid maid leat sádden. Jus sii dárbbašit eambbo dieđuid, de direktoráhtta sáhttá bivdit daid oažžut.  

Eanandoallodirektoráhtta meannuda ohcamuša ja dahká áššemearrádusa.

Ohcamuš sáhttá dárkkistuvvot. Don leat geatnegahtton dohkkehit dárkkisteami, addit dárbbašlaš dieđuid ja veahkehit čađahit dárkkisteami. Dárkkisteapmi sáhttá dagahit ahte áššemeannudeapmi maŋŋona.

Don oaččut álggos vástádusa Eanandoallodirektoráhtas mas čuožžu goassážii ášši lea meannuduvvon, ohcamuššii vástádus boahtá dasto e-poasta dahje poasta bokte.

Jus dutnje juolluduvvo doarjja, de dat máksojuvvojit automáhtalaččat du kontoi. Eanandoallodirektoráhtta dat máksá.

Don sáhtát váidit áššemearrádusa. Váidaga galgá sáddet Eanandoallodirektoráhttii. Eanandoallo- ja biebmodepartemeanta meannuda váidaga jus Eanandoallodirektoráhtta ii rievdat áššemearrádusa.

Váidináigemearri: 3 vahkku maŋŋel go leat ožžon áššemearrádusa.

Jus lea boastut máksojuvvon, jus njuolggadusat leat rihkkojuvvon dahje don leat addán boasttudieđuid, de sáhttá Eanandoallodirektoráhtta gáibidit ruovttoluotta máksojuvvot ja/dahje unnidit doarjaga.