Tilskot til kommunal jordvernstrategi

Vi har laga ein rettleiar for ordninga som kan vere nyttig å sjå på før man fyller ut søknadsskjema.

Det kan bli søkt om tilskot til å utarbeide ein kommunal jordvernstrategi. Kommunar som allereie har utarbeidd ein kommunal jordvernstrategi er ikkje i målgruppa for tilskotet. Det blir gitt om lag 100 000 kr til kvar kommune som får innvilga søknaden sin. Størrelsen på tilskotsbeløpet kan likevel variere etter mengd søknadar og om fleire kommunar går saman om å søke. Kommunane må difor oppgi søknadsbeløpet i søknaden.

Føremålet med ordninga er å bidra til at kommunar lagar ein kommunal jordvernstrategi. Kommunane er lokal planstyresmakt og forvaltar framtidig bruk av landets jordbruksareal gjennom vedtak av kommunale arealplanar. Det er difor avgjerande at kommunane har god kjennskap til både nasjonal og lokal verdi av areala i sin kommune. Dersom kommunane lagar sine eigne jordvernstrategiar, skaper det merksemd og bevisstheit om dyrka og dyrkbar jord, og gir kunnskap om verdien av areala.

Føremålet med å utarbeide kommunale jordvernstrategiar er auka kunnskap om jordbruksareala og auka merksemd rundt jordvernet. Målet med strategien er å redusere omdisponering av dyrka og dyrkbar jord i kommunen. Ein slik strategi kan gje langsiktigheit ved å teikne eit overordna bilete av forholdet mellom utbygging og bevaring av jordbruksområde.

Søknaden skal bli levert på søknadsskjema fastsett av Landbruksdirektoratet og må innehalde:

1. Namn på kommunen, kontaktperson, organisasjonsnummer og kontonummer.
2. Beskriving av kvifor kommunen søker om tilskot (Informasjon om utbyggingspress på dyrka og dyrkbar jord og omfang av jordbruksverksemd i kommunen, og korleis strategien skal bli følgt opp gjennom dei andre planverka i kommunen).
3. Planstatus i kommunen – når ble kommuneplanen sist rullert?
4. Beskriving av korleis arbeidet med strategien skal bli organisert.
5. Foreløpig framdriftsplan og budsjett for prosjektet, inkludert søknadsbeløp.

Bruk Søknadsskjema for tilskudd til utarbeiding av kommunal jordvernstrategi (Ldir-355 B) for å søke.

Send søknaden med eventuelle vedlegg til Landbruksdirektoratet på e-post postmottak@landbruksdirektoratet.no. Du får bekrefting på at søknaden er registrert på e-post.

Når Landbruksdirektoratet har fått søknaden vil du få beskjed om saksbehandlingstid og vidare saksgang.

Landbruksdirektoratet behandlar søknaden og gir vedtak.

Landbruksdirektoratet utbetalar pengane når vi har fått melding om at politisk vedtak om oppstart av planprosess er fatta.

Du kan klage på vedtaket. Klagen blir sendt til Landbruksdirektoratet. Landbruks- og matdepartementet vil behandle klagesaka viss ikkje Landbruksdirektoratet gjer om vedtaket.

Klagefrist: 3 veker frå vedtaket er motteke.

Dersom det er gjort feil i utbetalingar, ved regelbrot eller dersom det er gitt feil opplysningar, kan Landbruksdirektoratet krevje tilbakebetaling av tilskotet.