Birrasii 150 000 bohcco leat dál fáhtehallon guohtunrossui Nordlánddas ja Romssas ja Finnmárkkus. Sivvan guohtunrossui lea máŋga jiekŋageardnii ja jieŋkageardni leage maid eatnama vuostá ja dasa lassin lea vel olu muohta. Dát mearkkaša ahte boazu ii beasa guohtumiidda.
Guohtundilli bearráigehččojuvvo dárkilit gearggusvuođalávdegotti bealis mii lea nammaduvvon juohke boazodoaluguvlui. Stáhtahálddašeaddji jođiha lávdegottiid, ja miellahttut leat nammaduvvon boazodoalus ja biebmobearráigeahččus.
Orohagat leat ruđaid bidjan heahtefondii mat galget geavahuvvot dalle go lea celkojuvvon guohtunroassu. Dát ruđat galget rievtti mielde geavahuvvot ovdal go sáhttá ohcat roassogearggusvuođa liigedoarjaga.
Boazodoallošiehtadusa bokte bidjui liige ruhta roassogearggusvuhtii. Šiehtadallibealit leat ovttaoaivilis ahte galgá biddjot 4,50 ruvnnu juohke bohcco nammii jándoris. Doarjja galgá geavahuvvot bohccobipmui ja dan fievrredeapmái. Šiehtadallibealit háliidit dákko bokte sihkkarastit elliidčálggu ja boahttevaš buvttadeami. Stáhtahálddašeaddji gieđahallá doarjjaohcamiid ja Eanandoallodirektoráhtta máksá ruđaid orohaga gearggusvuođafondii.
– Lea biddjon ruhta mii galgá unnidit guohtunroasu váikkuhusaid, Stáhtahálddašeaddji lea ožžon birrasii 50 ohcamuša. Gálvolágideaddjit muitalit ges ahte sis lea válljis fuođar. Mii leat máksigoahtan doarjagii ja lea maid láhččojuvvon dainna lágiin ahte galgá leat álki ohcat doarjaga Eanandoallodirektoráhtta neahttasiidduid bokte, muitala boazodoalu ossodaga direktevrra Liv Berit Hætta.
Hætta oaivvilda boazodolliid valdit stuorra ovddasvástadusa guohtunroasu oktavuođas ja sii árvvoštallet sihke johtit ealuidisguin, njuovvat eanet dahje biebmat.